Ангишт

Захираҳои сӯзишворӣ ва энергетикӣ барои иқтисодиёти Тоҷикистон муҳим мебошанд. Кишвар дар замони Иттиҳоди Шӯравӣ талаботи худро бо роҳи воридоти солона 2 миллион тонна аз дигар ҷумҳуриҳои Иттиҳоди Шӯравӣ қонеъ мекард. Истихроҷи саноатии ангишт дар Тоҷикистон дар асоси ду кони «Шуроб» ва «Фон-Яғноб» амалӣ гардида, солона ба бештар аз 1,5 миллион тонна мерасад.

Яке аз ҷолибтарин конҳои ангишти Тоҷикистон кони антрасити “Назар-Айлоқ” дар ноҳияи Рашт мебошад, ки дар қисмати шарқи кишвар дар масофаи 280 км аз Душанбе воқеъ аст. Дар рафти нахустин таҳқиқотҳои пешакӣ, ки мутаассифона дар натиҷаи рӯйдодҳои маълуми соли 1991 катъ шуда буданд, дар ин минтақа 16 қабати ангишти сохторҳои оддӣ ва мураккаб кашф гардиданд, ки 15-тои онҳо арзиши саноатӣ доранд.

Ба қабатҳои ангиштсангҳои шаклҳои 1Y, Y ва Y1 таваҷҷӯҳи махсус зоҳир карда мешавад, ки сифати онҳо аз ангиштсанги кони дар ҷаҳон маъруфи Ветнам “Ха Ту” камӣ надоранд. Санҷишҳои техникие, ки дар муассисаҳои махсуси таҳқиқотӣ ва корхонаҳои Федератсияи Россия ва Ӯзбекистон гузаронида шуданд, мутобиқати ин антраситҳоро барои истеҳсоли карбюризатор таъид карданд, ки барои гудохтани металлҳои махсус ва оҳанҳои синтетикӣ, барои графитизатсиякунии маҳсулоти ба оташ тобовар, карбиди калтсий, маҳсулоти баландсифати дорои электрод, сорбент, гази обӣ, кокси сунъӣ ва графитҳои қабатӣ метавон истифода бурд. Тибқи ҳолати кунунии корҳои иктишофӣ захираҳои геологии кони ангишт тақрибан 212 миллион тоннаро ташкил медиҳанд.