Маркази Ош дар Душанбе

22 декабр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кӯчаи Раҳимии ноҳияи Синои пойтахт бинои зебову замонавии Маркази хизматрасонии «Маркази Ош»-ро мавриди истифода қарор доданд.

Маркази хизматрасонии «Маркази Ош аз таҳхона ва 3 ошёна иборат буда, дар асоси дастуру ҳидоятҳои Сарвари давлат муҳтарам Эмомалӣ Раҳмон аз ҷониби соҳибкори ватанӣ Умарҷон Алимадов ба истиқболи ҷашни бузургу муқаддаси миллӣ – 35-солагии Истиқлоли давлатии Ҷумҳурии Тоҷикистон бо риояи санъати хоси меъмории миллӣ бунёд ёфтааст. Иншоот аз ҷиҳати тарҳ, имконоти хизматрасонӣ ва ороиши анъанаи фарҳанги қадимаи миллӣ дар Осиёи Миёна беназир мебошад.

Пешвои миллат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ нахуст бо раванди омода намудани ин навъи таоми миллӣ, ки аз сӯи таббохони моҳири марказ дар 16 деги гуногунҳаҷм ва деги дутоннагӣ дам андохта шуда буд, шинос шуданд.

Тазаккур бояд дод, ки ош яке аз хӯрокҳои болаззати миллии тоҷикон маҳсуб шуда, соли 2016 дар ҷаласаи 11-уми байнидавлатии ЮНЕСКО оид ба ҳифзи мероси фарҳанги ғайримоддӣ ба қатори беҳтарин намунаҳои фарҳанги ғайримоддии ҷаҳонӣ шомил гардидааст.

Марказ дорои ду ошхона ва се толор, аз ҷумла толори ош, тарабхонаи миллии оилавӣ ва толори баргузории маҳфилу чорабиниҳои гуногун буда, бо тамоми дастгоҳу таҷҳизот ва дигар шароити муосири хизматрасонӣ, аз ҷумла мониторҳои намоишӣ таъмин мебошад.

Дар марказ ҳамчунин ду толори хурд- ҳар яке бо 144 ҷойи нишаст мавҷуд аст.

Толори ош дар ошёнаи якуми бино ҷойгир буда, дорои 550 ҷойи нишаст мебошад. Дар ин макон асосан барои мизоҷону меҳмонон навъҳои гуногуни оши палав пешниҳод мегардад.

Тарабхонаи миллии оилавӣ дар қабати дуюми марказ ҷойгир буда, дорои 290 ҷойи нишаст аст. Ҳамчунин дар ин толор 4 ҳуҷраи алоҳида барои мизоҷону меҳмонон ташкил гардидааст.

Пешвои миллат муҳтарам Эмомалӣ Раҳмон дар ҳамин толор бо намояндагони корпуси дипломатии муқими Тоҷикистон, ки аз аввалин меҳмонони «Дунёи ош» буданд, суҳбат намуда, аз маҳбубият ва лаззати беназири таомҳои миллӣ ёдовар шуданд.

Таъкид гардид, ки хӯрокҳои миллии тоҷикӣ дар ҷаҳон маъруф буда, санъати таббохии тоҷик садсолаҳо зери таъсири таърихи ғанӣ ташаккул ёфтааст.

Толори маҳфилу чорабиниҳои марказ, ки бо санъати хос оро ёфтааст, дорои 220 ҷойи нишаст буда, бо нақшу нигори миллӣ ва насби мониторҳои калонҳаҷм бо ҳашамати беназираш барои ҳар бинанда диққатҷалбкунанда мебошад.

Дар ин толор қандилҳои хурду бузург бо рангҳои гуногун, зиёда аз 200 чароғи равшанидиҳанда, монитор барои пахши мустақим ва намоиши барномаҳо насб гардидааст, ки барои дар сатҳи баланд баргузор гардидани ҳар гуна ҷамъомаду чорабиниҳо мусоидат менамояд.

Дар маҷмуъ дар Маркази хизматрасонии  «Маркази Ош» дар як вақт ба 1060 нафар хизмат расонида мешавад.

Сарвари давлат муҳтарам Эмомалӣ Раҳмон пас аз шиносоӣ бо имконот ва шароити замонавии хизматрасонӣ дар «Маркази Ош» ба иқдоми соҳибкори ватанӣ Умарҷон Алимадов барои дастгирӣ аз сиёсати созандаю бунёдкоронаи Ҳукумати Ҷумҳурии Тоҷикистон ва дар ин замина фароҳамсозии ҷойҳои нави корӣ барои сокинон изҳори сипосу миннатдорӣ намуданд ва ба масъулон ҷиҳати таъсиси чунин марказҳо дар тамоми шаҳру ноҳияҳои мамлакат дастуру маслиҳатҳои судманд доданд.