Ҷ. К. Роулинг ва Гарри Поттер — Донишхона

Ҷ. К. Роулинг ва Гарри Поттер

Баъзан саргузашти шахсиятҳои машҳур аз далелҳои хушку холӣ ва носаҳеҳ, ки ба хотири зиёд намудани саҳифаҳо мураттаб мегарданд, иборат мебошад. Вале мо тасмим гирифтаем, ки ҳаёту рӯзгори чунин ашхосро тавре баёну пешниҳоди хонандаи хушзавқ гардонем, ки ба табъу завқ созгор буда, то дер дар хотирҳо нақш бандад. Яке аз саргузаштҳои навбатӣ, ки метавонад хотирмон бошад, ин саргузашти Ҷоан Роулинг аст.

Ҷоан Кетлин Роулинг нависандаи машҳури англисзабон, муаллифи роман оид ба саргузашти Гарри Поттер мебошад, ки бо зиёда аз 60 забони дунё тарҷума шудааст. Ҷоан Роулинг зодаи музофоти Глостершири Англия буда, овони мактабхониаш бо сабаби якчанд маротиба аз як шаҳр ба шаҳри дигар кӯч бастани аҳли оилаашон дар шаҳрҳои гуногун сипарӣ гардидааст. Ӯ духтараки сокиту оромтабиат буда, қобилияти хуби забономӯзӣ дошт. Аз ҷумла забони англисӣ ва фаронсавиро ба хубӣ медонист.

“ХАРГӮШАК”

Ҷоан аз хурдсолӣ нақл кардани ҳар гуна саргузаштҳои шавқоварро дӯст медошт. Ӯ афсонаи нахустини худ “Харгӯшак”-ро дар синни 5-солагӣ навишта буд. Ин афсона аз саргузашти харгӯшаке қисса мекунад, ки ба бемории сурхча гирифтор мешавад ва дӯстонаш, аз қабили занбӯри азимҷусса бо номи Хонум Ору ба хонаи ӯ ба меҳмонӣ меоянд. Ҷоани ҷавон қиссаҳои аҷоибу ғароиби фантастикӣ таълиф намуда, онҳоро нахуст ба хоҳараш Ди мутолиа мекард. Қариб ҳама қаҳрамонҳои афсонаву қиссаҳояш шарикдарсон ва муаллимонаш буданд.

ТАҲСИЛ

Роулинг дар замони наврасӣ аз модар маҳрум монд, ки ин барояш зарбаи сахте буд. Аммо бо вуҷуди ин аз таҳсил ақиб намонд. Баъди хатми мактаб хост ба Донишгоҳи Оксфорд дохил шавад, аммо бахташ омад накард ва таҳсилашро дар яке аз донишгоҳҳои маҳаллӣ идома дод. Баъди хатми донишгоҳ ӯ ба Лондон рафта, дар яке аз донишгоҳҳои тадқиқотӣ ба кор шуруъ намуд.

ШУҒЛИ ДӮСТДОШТА

Роулинг дар 26-солагӣ ба Португалия кӯчида, дар яке аз донишгоҳҳо аз фанни забони англисӣ дарс медод. Дар он ҷо бо ҳамсари ояндаи худ шинос гардидаву оила барпо намуд. Ӯ то нисфирӯзӣ дарс медоду нимаи дуюми рӯз ба иншои романи навбатии худ машғул мешуд. Қаблан ду асари ӯ эътироф нагардидаву чун асарҳои “бад” ба арсаи адабиёт ворид нашуданд.

ГАРРИ ПОТТЕР

Ҷоан Роулинг романи худ Гарри Поттерро бо мошинаи чопкунии куҳнасохт навишта буд. Ӯ ҳангоми хоб будани духтараш Ҷессика дар сари мизи қаҳвахона нишаста эҷод мекард. Романи нави ӯ аз ҳаёти писарбачае қисса мекард, ки ҷодугар будани худро эҳсос кардаву ба мактаби ҷодугарон афтид. Нусхаи дастнависи китоб ба 12 нашриёт фиристода шуд, ки аз ҷониби ҳамаи онҳо рад карда шуд. Баъдан ӯ ба Шотландия кӯчид ва навиштани романи худро идома медод. Шӯрои санъати Шотландия барои ба анҷом расондани роман ба ӯ грант ҷудо намуд. Оқибат баъди як сол барояш муяссар гардид, ки китобашро бо номи “Гарри Поттер ва санги фалсафӣ” ба нашриёти “Блумсбер”- и Британияи Кабир бо арзиши 4000 доллари амрикоӣ фурӯшад.

ТАЛАБОТИ ҒАЙРИОДӢ

Вақте китоби аввалаш “Гарри Поттер” ба нашр мерасид, нашриёт аз Ҷоан талаб намуд, ки дар муқоваи китоб танҳо насабашро нависад. Ин талабот ба хотири он буд, ки шояд писарбачаҳо, ки мухлиси асосии ин асар буданд, зан будани муаллифро фаҳмида, аз харидории он худдорӣ кунанд, чунки дар он замон писарон адибони ҷинси занро чандон намеписандиданд. Ҳамин тариқ, дар муқоваи китоб номи муаллиф чунин сабт ёфт: Ҷ. К. Роулинг. Ӯ бо тахаллуси Роберт Гелбрейт низ таълиф мекард.

КИТОБИ СОЛ

Китоб баъди нашри аввал (соли 1997) дар Британияи Кабир ба маблағи 20 000 доллари амрикоӣ ба фурӯш рафта, бо ҷоизаи “Китоби сол” сарфароз гардид. Баъдан он дар ИМА бо номи нави “Гарри Поттер ва санги ҷодугар” ба нашр расид. Китоби дуюми ин силсила бо номи “Гарри Поттер ва утоқи махфӣ” дар Британияи Кабир ва баъди як сол дар ИМА ба табъ расид. Китоби сеюм бошад, бо унвони “Гарри Поттер ва маҳбус Азкабан” низ нахуст дар Британияи Кабир, баъдан дар ИМА чоп шуд.

НАШРИ ПАЙДАРПАИ КИТОБ

Роулинг бо китоби худ доир ба саргузашти Гарри Поттер дар майдони адабиёт ҳангомае бапо кард. Се китоби аввали силсилаи “Гарри Поттер” дар сархати шоҳасарҳои машҳури рӯзномаи “Ню-Йорк Таймс” ҷо гирифтанд, ки ин аз комёбии бемисли муаллиф маҳсуб меёфт.

Соли 2000-ум зиёда аз 35 миллион нусхаи се китоби аввали Роулинг, ки бо 35 забон тарҷума шуда буданд, ба маблағи 480 миллион доллар ба фурӯш рафтанд. Нашри аввали “Гарри Поттер ва Ҷоми оташ” бо пешпардохтҳои фармоишии зиёда аз 1,8 миллион доллар 5,3 миллион нусхаро ташкил дод. Китобҳои баъдии ин силсила “Ордени Феникс”, “Шоҳзодаи дурага” ва “Ҳадяи марг” низ аз рӯи миқдори нашр ва даромаднокӣ пешгом буданд.

АДАДИ НАШР — 400 млн. НУСХА

Адади нашри 7 китоб оид ба саргузашти Гарри Поттер 400 миллион нусхаро ташкил дод. Соли 2000-ум ширкати Warner Brothers филмеро аз рӯи китоби аввал доир ба Гарри Поттер истеҳсол намуд ва соли 2001 нахустнамоиши филми ҳаштум баргузор гардид, чунки филми охирин аз ду қисмат иборат буд. Ҳамаи 8 қисмати филм маъруфияти ҷаҳонӣ пайдо намуда, дар сархати беҳтарин филмҳои дунё қарор гирифтанд.

“КИТОБИ КӮДАКОНАИ АСР”

Роулинг Гарри Потерро замоне таълиф намуд, ки ба сараш андуҳи гарон омада буд ва мехост, аз ин вазъият худро раҳо созад. Имрӯз асари Гарри Поттер ва муборизаи ӯ алайҳи қувваи бадӣ яке аз асарҳои машҳуртарини кӯдакона маҳсуб ёфта, унвони ифтихории “Китоби кӯдаконаи аср”-ро соҳиб аст. Гарчанде наметавон онро пурра китоби кӯдакона номид.

Добавить комментарий

Ваш e-mail не будет опубликован. Обязательные поля помечены *