Гаронтарин шаҳрҳои ҷаҳон кадомҳоянд?

Аз рӯи баҳодиҳии ширкати илмӣ-тадқиқотии бритонии “Economist Intelligence Unit” (EIU) Сингапур соли сеюм аст, ки пайиҳам дар рӯйхати қиматтарин шаҳрҳои ҷаҳон ҷои аввалро ишғол мекунад.

Сюрих (Швейтсария) ва Ҳонконг ҷойҳои дуюму сеюмро мегиранд. Ҷойҳои минбаъдаро дар ин рӯйхат Женева, Париж, Лондон, Ню-Йорк, Копенгаген, Сеул ва Лос-Анҷелес ишғол кардаанд.

Мутахассисони EIU ҳангоми тартиб додани рӯйхат арзиши 160 номгӯи маҳсулоту хизматрасониҳо, аз қабили маҳсулоти хӯрокворӣ, либосворӣ, ашёи рӯзгор, косметика, иҷораи манзил, хароҷоти нақлиёт, маблағи таҳсил ва ғайраро ба инобат гирифтаанд. Тибқи рейтинги мазкур хароҷоти нақлиёт барои сокинони Сингапур нисбат ба сокинони Ню-Йорк 2,5 маротиба қиматтар будааст. Воқеан, Ню-Йорк дар рейтинги шаҳрҳои қиматтарин 42 зина боло рафт. Яъне, дар он маҳсулоти асосӣ ва хизматрасонӣ қимат шуд. Шаҳрҳои Сидней (Австралия), Мелбурн ва Осло (Норвегия) аз рӯйхати даҳгонаи шаҳрҳои қиматтарин берун шуданд.

Арзонтарин шаҳр барои зиндагонӣ пойтахти Замбия — шаҳри Лусака мебошад. Воқеан, Лусака бародаршаҳри Душанбе аст. Шаҳрҳои Бангалору Мумбай (Ҳиндустон), Алмаато, Алҷазоир, Ченнай, Деҳлӣ (Ҳиндустон), Димишқ ва Каракас шаҳрҳои арзонтарин маҳсуб меёбанд.

Алишери САЙФИДДИН, “ҶТ”

Добавить комментарий

Ваш e-mail не будет опубликован. Обязательные поля помечены *